Distribucion di Awa

Nos red di distribucion di awa di bebe ta consisti di tankinan di reserva di awa, pomp di awa y tuberia di awa

Tanki di reserva, pomp di awa, tuberia di awa
 
Mapa di red di distribucion
Ta pomp e awa di bebe produci na WEB Aruba pa 6 tanki di reserva di awa riba WEB su propio tereno. E tankinan aki ta sirbi como un reserva di seguridad pa e proceso di desalinacion. Banda di e tankinan aki, tin 7 tanki di awa instala na puntonan strategico di Aruba.

Tankinan di Reserva Primario

Ta pomp e awa di bebe produci pa 6 tanki di reserva di awa situa riba WEB su tereno na Balashi. E 6 tankinan aki ta sirbi como un reserva primario y tin un capacidad di reserva combina di 65,000 m3. For di eynan ta pomp e awa di bebe den e sistema di distribucion via e tubo principal, e asina yama ‘Aruba Header’.

Distribucion Tankinan di Reserva

E tankinan ta situa na San Nicolas, Savaneta, Mondi Fierno, Urataka, Jaburibari, Alto Vista y Oranjestad. E tankinan di distribucion ta sirbi como un reserva secundario y tin un capacidad di reserva combina di 70,000 m3.

E tankinan di distribucion tambe ta sirbi pa mantene e balans den presion di awa. Cu excepcion di e tanki di Oranjestad, tur tanki ta situa riba topnan di sero cu elevacionnan cu ta varia di 60 pa 110 meter riba nivel di lama. E tanki mas halto ta esun na Urataka situa den e districto di Santa Cruz. E awa di e tankinan riba e topnan di sero ta distribui pa medio di forsa di gravedad, cual ta sigura presion stabil na tur punto di entrega.

Distribucion Tuberia

E sistema di distribucion ta consisti di tuberia cu un largura total di 700 km y ta sirbi pa conecta mas o menos 40,000 cas y compania. Diameter di e tuberia ta varia di 1 inch pa 16 inch. E tubonan di 1 y 2 inch ta di koper. E tubonan di 4 pa 16 inch ta di hero (ductile cast iron). E tubonan di hero tin un laag di cement parti paden y ta tapa cu bitumen parti pafor. E pipanan tambe a cubri cu tape PolyEthylene pa proteccion extra contra corosion.

Gradualmente, WEB ta reemplasa tur su red di distribucion cu tubonan di High-Density PolyEthylene (HDPE) . E material aki ta hopi resistente na corrosion. E tubonan ta wordo junta dor di welder. E partinan cu ta welder tin mesun forsa cu e tubo mes, y pa e motibo ey e no ta vulnerable pa lekkage. 

Stacionan di Pomp

Den algun parti di nos red di distribucion tin mester di extra pomp pa yuda transporta e awa riba distancianan largo. Tin 5 stacion di pomp na varios sitio rond di Aruba. E pompnan ta wordo monitorea y opera uzando un sistema automatiza c uta uza tecnología di Telemetry.

Como parti di un projecto di varios aña, WEB ta remplasando tur pompnan convencional cu Pompnan “Variable Frequency Drive” (VFD). E pompnan aki ta spaar energía paso nan ta traha “on demand”, comparabel cu e tecnología di airco inverter.

Hydrant

WEB ta responsabel pa instalacion y mantencion di varios hydrant. E hydrantnan ta situa na puntonan strategico y e sitionan a wordo coordina di serca cu Brandweer. Tin aproximadamente 900 hydrant instala den e red di distribucion.

Quality Assurance

Pa garantisa awa di bebe di calidad halto na tur punto di entrega, un cantidad di medida preventivo ta wordo tuma. Cada tubo saliendo for di nos planta na Balashi tin un sistema desinfectane UV. Cada tubo nobo cu wordo instala ta wordo desinfecta cu chloor y después di spula ta wordo gestest pa contaminación biológico y chimico prome cu e wordo poni den uzo. Tubonan ta wordo spula regularmente pa preveni awa stagna. Tur awa di spula ta wordo ofreci na Santa Rosa (Departamento di Cria y Pesca) gratis pa uzo di cunuceronan local.

E awa su calidad ta wordo monitorea y ta wordo getest rutinariamente dor di Hygienische Dienst y/of e Departamento di Salud Publico. Cada dos siman ta tuma monster na varios sitio den nos red di distribucion. E monsternan ta wordo getest pa Landslaboratorium.

Infrastructure Leakage Index

Danki na medidadanan optimal pa minimalisa deterioro interno di tubería y programanan di mantención efectivo, perdidad di awa den nos red di distribución ta minimo. Perdida den distribución ta wordo calcula uzando un benchmark internacional, e asina yama “Infrastructure Leakage Index” of “ILI”. WEB su red ta score un ILI di 0.51 cual ta wordo considera extremamente abou, indicando cu tin en verdad masha tiki perdida. 

Tanki di reserva, pomp di awa, tuberia di awa
Mapa di red di distribucion