Ta pomp e awa di bebe produci na WEB Aruba pa 7 tanki di reserva di awa riba WEB su propio tereno. E tankinan aki ta sirbi como un reserva di seguridad pa e proceso di desalinacion. Banda di e tankinan aki, tin 7 tanki di awa instala na puntonan strategico di Aruba.
Tankinan di Reserva Primario
Ta pomp e awa di bebe produci pa 7 tanki di reserva di awa situa riba WEB su tereno na Balashi. E 7 tankinan aki ta sirbi como un reserva primario y tin un capacidad di reserva combina di 84.000 m3. For di eynan ta pomp e awa di bebe den e red di distribucion via e tubo principal, e asina yama ‘Aruba Header’.
Distribucion Tankinan di Reserva
E tankinan ta situa na Sero Preto, Savaneta, Mondi Fierno, Urataka, Jaburibari, Alto Vista y Oranjestad. E tankinan di distribucion ta sirbi como un reserva secundario y tin un capacidad di reserva combina di 74.000 m3.
E tankinan di distribucion tambe ta sirbi pa mantene e balans den presion di awa. Cu excepcion di e tanki di Oranjestad, tur tanki ta situa riba topnan di sero cu elevacionnan cu ta varia di 60 pa 110 meter riba nivel di lama. E tanki mas halto ta esun na Urataka situa den e districto di Santa Cruz. E awa di e tankinan riba e topnan di sero ta distribui pa medio di forsa di gravedad, cual ta sigura presion stabil na tur punto di entrega.
Distribucion Tuberia
E red di distribucion ta consisti di tuberia cu un largura total di 1052 km y ta sirbi pa conecta mas o menos 51.000 cas y compania. Diameter di e tuberia ta varia di 1 inch pa 16 inch. E tubonan di 1 y 2 inch ta di koper. E tubonan di 4 pa 16 inch ta di hero (ductile cast iron). E tubonan di hero tin un laag di cement parti paden y ta tapa cu bitumen parti pafor. E pipanan tambe a cubri cu tape PolyEthylene pa proteccion extra contra corosion.
Gradualmente, WEB ta reemplasa su tuberia di distribucion di 1 y 2 inch di koper, cu tubonan di High-Density PolyEthylene (HDPE) . E material aki ta hopi resistente na corrosion.
Stacionnan di Pomp
Den algun parti di nos red di distribucion tin mester di extra pomp pa yuda transporta e awa riba distancianan largo. Tin 5 stacion di pomp na varios sitio rond di Aruba. E pompnan ta wordo monitorea y opera uzando un sistema automatisa cu ta uza tecnología di telemetria.
Como parti di un proyecto di varios aña, WEB ta remplasando tur pompnan convencional cu Pompnan “Variable Frequency Drive” (VFD). E pompnan aki ta spaar energía paso nan ta traha “on demand”, comparabel cu e tecnología di airco inverter.
Hidrant
WEB ta responsabel pa instalacion y mantencion di hidrant riba nos isla. E hidrantnan ta situa na puntonan strategico y e sitionan a wordo coordina di cerca cu Brandweer. Tin aproximadamente 940 hidrant instala den e red di distribucion.
Garantia di Calidad
Pa garantisa awa di bebe di calidad halto na tur punto di entrega, ta tuma un cantidad di medida preventivo. Cada tubo saliendo for di nos planta na Balashi tin un sistema desinfectante UV. Ta desinfecta cada tubo nobo instala cu chloor y despues di spula ta test pa contaminacion biologico y kimico prome cu pone e tubo den uzo. Ta spula tubonan regularmente pa preveni awa stagna. Ta ofrece e awa di spula na Santa Rosa (Departamento di Cria y Pesca) gratis pa uzo di cunukeronan local.
Ta monitoria y test e awa su calidad rutinariamente dor di Hygienische Dienst y/of e Departamento di Salud Publico. Cada dos siman ta tuma muestra na varios sitio den nos red di distribucion. E muestranan ta wordo getest pa Landslaboratorium.
Infrastructure Leakage Index
Danki na medidadanan optimal pa minimalisa deterioro interno di tuberia y programanan di mantencion efectivo, perdidad di awa den nos red di distribucion ta minimo. Ta calcula perdida den distribucion uzando un benchmark internacional, e asina yama “Infrastructure Leakage Index” of “ILI”. WEB su red ta score un ILI di 0.51 cual ta considera extremamente abou, indicando cu tin en verdad masha tiki perdida.
