WEB Aruba no solamente ta dedica na suministra un producto eficiente, stabil y confiabel; nos compania tambe ta dedica na cambia e manera di produci energia. Activamente nos ta traha rumbo pa un futuro menos dependiente di combustibel fosil y cu un impacto minimal riba nos medio ambiente. 

Actualmente nos ta produci energia segun diferente metodo:

Motornan RECIP

• Pa cumpli cu e demanda creciente pa energia, pa aumenta eficiencia y pa baha e impacto riba medio ambiente, WEB Aruba na 2006 a introduci motornan RECIP: Reciprocating Internal Combustion Engines. Cu e tecnologia aki WEB a hisa confiabilidad y eficiencia di su suministro cu mas o menos 30%. Un motor reciprocante, tambe conoci como un motor di piston, ta un motor termico. E motor ta uza un of mas piston alternativo pa converti presion den un movimento di rotacion pa por laga un generador electrico traha. Esaki ta resulta den generacion di energia. 

Turbina di Biento

• Pa aumenta eficiencia y produccion di energia renovabel, WEB Aruba na 2009 a cera un acuerdo cu Windpark Vader Piet NV pa exclusivamente cumpra energia genera pa e parke di turbina di biento. Aumento di eficiencia y menos uzo di combustibel ta resultado di e proyecto aki cual ta consisti di 10 turbina di biento. Cada turbina tin un capacidad di 3 megawatt (MW) y hunto nan tin un capacidad total di 30 megawatt. Considerando variablenan manera intensidad y velocidad di biento, a calcula cu e parke por genera te na un promedio di 60% di utilisacion di capacidad.
• Desde 2009, 16% pa 17% di Aruba su produccion di energia a ser genera di Windpark Vader Piet. Na 2022 a inicia un proceso pa prepara construccion di un parke di biento nobo na Rincon. Instalacion di e parke di turbina di biento nobo aki por aumenta energia renovabel te 35%, basa riba e maneho di energy di Gobierno di Aruba.

Sistema Solar Fotovoltaico

E futuro previsto di WEB Aruba ta pa ta mas limpi, mas berde y liber di combustibel. Pa logra e obhetivo aki WEB mester envolvi su mes cu tecnologianan mas limpi y mas berde pa un suministro di awa y energia mas sostenibel. Tecnologianan mas limpi lo genera menos emision y asina reduci ‘carbon footprint’ cual lo tin un impacto positivo riba medio ambiente. Na 2018 WEB a pone den funcionamento su Sunrise Solar Park na Lago Heights; un parke solar fotovoltaico grandi, cual ta consisti di un sistema solar fotovoltaico monta den suelo na gran escala cu un capacidad total calcula di 7.5 MW y un capacidad maximo di 6 MW pa dia. 

Almacena Energia

Di acuerdo cu WEB Aruba su strategia di energia renovabel (ARES), WEB a inicia diferente proyecto pa almacena energia renovabel. E proyectonan aki ta hunga un rol importante den mantene e red electrico stabil y eficiente. E proyecto Flywheel ta consisti di 20 Flywheel cu un capacidad di almacena energia di 5 MW durante 12 minuut. Un ‘flywheel’ ta un sistema di almacena energia bou di tera, cu ta converti energia cinetico den energia electrico. Como cu e tecnologia aki ta relativamente nobo, e parke di Flywheel na WEB ainda ta den su fase di optimalisacion. E ‘Battery Energy Storage (BESS) ta un proyecto piloto y ta sirbi pa colecta datonan confiabel y specifico di e sitio. E datonan lo yuda determina e diferente formanan den cual por uza y integra almacenahe di energia di bateria den WEB su mix di produccion existente.

IGMS

A introduci WEB Aruba su Intelligent Generation Management System (IGMS) na 2021. E IGMS ta regula suministro di energia automaticamente. Simultaneamente WEB hunto cu ELMAR a introduci Intelligent Load Shedding System (ILS). IGMS y ILS ta limita interupcionnan largo y areanan menos afecta. IGMS ta mantene suministro di energia pa ELMAR stabil y ta facilita accion mas rapido durante interupcionnan of fluctuacion den demanda di energia.  

Futuro

Den liña cu nos vision, e introduccion di gas natural, como reemplasante di Heavy Fuel Oil, ta planea pa 2025.