Tin hopi forma pa spaar awa den cura. Esaki ta algun di nos mihor tipnan:

• Check tur cranchi, tuberia y otro acesorio di awa pafor di cas regularmente pa lekkage. Un solo cranchi cu ta lek por gasta 2,000 liter di awa pa luna.

• Purba tene e nivel di awa den bo pool te na mitar di e skimmer. Un piscina cu ta demasiado yen ta laga e skimmer traha ineficientemente y ta gasta awa innecesario.

• Uzo di un pool-cover ta reduci evaporacion y ta reduci tambe e necesidad di yena e pool cu mas awa. Sin un cover, mas cu mitar di e awa den bo pool por evapora dentro di un aña.

• Si bo ta buscando un sistema automatisa pa muha mata (irigacion), considera un drip-system. E sistema aki ta percura cu awa ta bay solamente caminda tin mester di dje, evitando cu awa bay perdi.

• Yerba cu raisnan hundo, por sobrevivi temporadanan di secura. Pa crea raisnan hundo, duna e yerba un muha profundo de ves en cuando cu un slang di cas.

• Pa yuda yerba nobo crea raiz, por haci uzo di un fertilisante suave, un asina yama “Light Top Dressing” ariba e yerba. Ademas di crea raiz e ta minimalisa e cantidad di awa cu e yerba tin mester. Papia cu un experto den plantamento pa un top dressing mix organico, basa ariba santo y liber di mal yerba (onkruid).

• Ora di planta matanan nobo den cura, pone matanan den grupo cu tin mester di cantidadnan di awa similar. Por ehempel: flornan tur cerca di otro y cadushi y aloe cerca di otro.

• Purba di no corta yerba mucho cortico. Ora di corta, corta solamente e parti mas ariba di e blachi, esaki ta yuda evita cu e awa di muha evapora for di e yerba.

• Uza Mulch y Compost den bo tera di planta. Esaki ta haci e tera mas gordo y ta yuda mantene humedad y reduci evaporacion.

• Ta mihor pa muha e raiznan y tera rond di bo matanan en bes di spuit awa ariba blachi y flornan.

• Muha bo hardin mainta trempan of durante bahada di solo ta reduci perdida di awa di matanan dor di evaporacion.

• Tuma tempo pa relaha den bo hardin, duna bo matanan awa na man uzando un gieter. Esaki ta un di e mihor maneranan pa percura cu bo matanan haya e cantidad di awa cu nan tin mester.

• Warda bo restonan di cushina, blachinan di mata y lo cual cu corta for di yerba; nan ta e ingredientenan perfecto pa traha gordura na cas. E tera y matanan lo apreci’e!

• Evita di spuit pasillo, patio y entradanan/parkeerplaats pa kita stof y blachi. Uza un basora, hark of leaf-blower pa haci nan limpi.

• Laba bo auto ariba e yerba den cura y uza un hemchi pa laba y rinse e auto. Bo lo spaar awa, muha y fertilisa bo cura – habon di laba auto tin algun fosfato aden cu ta similar na varios tipo di gordura.

• Opta pa yerba cu ta crece poco poco y cu ta spaar awa manera Palmetto. Esaki tin raiz hundo pa tolera secura y no mester wordo corta mes tanto cu otro tipo di yerba.

• Opta pa matanan indigeno di Aruba y pa matanan cu ta consumi tiki awa, e decision ta resulta den menos mantencion y menos uzo di awa.

• Muhando mata den un hardin plat, muhele mas largo, pero menos frecuente. Esaki ta promove crecemento di raiznan mas fuerte y saludabel cu por tolera poco secura. Corda uza un slang of gieter of instala un drip-system. (Mas o menos 12 millimeter pa ora ta suficiente pa mayoria hardin).