Con por reduci riesgo di contaminacion di awa di bebe na cas?

• Flush e pipanan di awa si bo no a uza nan pa 1 siman of mas largo. Pa evita desperdicio, uza e awa di flush pa muha mata of pa laba auto. No lubida di flush e pipanan di awa cayente tambe;
• Sigura cu tur cranchi, ducha, wc y posibel sistema di sprinkler ta wordo uza regularmente;
• Haci bañonan di vapor, jacuzzi of humificadornan bon limpi segun nan instruccionnan;
• Configura heaternan di awa adecuadamente na un minimo di 60°C;
• Decalcifica duchanan regularmente;
• Laga slangnan di awa drain bon despues di uzo;
• Kita partinan di tuberia cu no ta den uzo (seccionnan di pipa ‘dead end’).

Con pa flush?

• Flush tur cranchi cu no a uza mas largo cu 1 siman; 
• Pa di prome, flush e wc(nan) 3 biaha; 
• Flush e cranchinan despues di a flush e wc(nan); 
• Ora di flush ducha, habri e awa cayente prome (si aplicabel) y despues e awa friu.

Legionella

Bacterianan comun den awa di bebe ta Legionella. Nan ta aparece di forma natural den lugarnan humedo, den suela y den awa. Bacterianan Legionella ta mes inevitabel cu tur otro tipo di bacteria. E cantidad di Legionella den awa di bebe ta asina abou cu e bacterianan no ta representa ningun menasa. Sinembargo, den awa stanca, e bacterianan Legionella ta crece y reproduci hopi liher den awa di bebe!  

Como cu Legionella por causa ‘Legionnaires’ disease’, ta importante cu abo, como propietario di cas, ta tuma e medidanan necesario pa limita Legionella den tuberia di awa di bo cas.

Legionnaires’ disease

Legionnaires’ disease ta un infeccion di pulmon causa pa bacterianan Legionella. No ta existi vacuna, pero por trata e enfermedad cu antibioticonan specifico si aplica mas pronto posibel. Tambe ta existi un forma mas leve, e griep di legionella of ‘Pontiac Fever’, cu ta desaroya manera un griep ‘normal’.

Con hende ta infecta?

Personanan ta core riesgo di infecta door di inhala gotanan hopi chikito di awa (den forma di niebla of aerosol) of awa cu ta contene nivelnan halto di bacterianan Legionella. E gotanan aki ta aparece mas tanto den ducha, jacuzzi, bañonan di vapor, fonteinnan y ‘cooling towers’. Mayoria persona no ta bira malo di bebe awa cu Legionella, y e bacterianan aki no ta transferibel di persona pa persona. Algun persona sinembargo ta core mas riesgo di bira malo, manera adultonan mayor, personanan cu resistencia abou debi na un enfermedad, personanan cu ta uza medicamento anti imuun y esnan cu ta huma.

Con nos aki na WEB Aruba ta preveni Legionella? 

Banda di e programa di testmento periodico, WEB Aruba tin un programa di testmento anual pa detecta Legionella den su red di suministro y distribucion di awa. Si ta detecta cantidadnan halto di Legionella, nos ta tuma accion mesora. Tambe nos tin un programa di mantencion structural pa flush y desinfecta tuberia di awa. Parti di e mantencion ta un programa fiho di tuma muestra den henter e red di suministro y distribucion di awa, incluyendo e tankinan. Ta haci analisis bacteriologico y kimico riba e muestranan di awa. Si WEB Aruba detecta algun muestra cu no ta cumpli cu e standardnan, lo flush e sistema of tuberia y si ta necesario, desinfecta nan.