Mayoria compania y institucion tin un instalacion di awa di bebe colectivo cu ta suministra awa na
tercernan. E propietario di un instalacion di awa di bebe of edificio ta responsabel pa calidad di e
awa desde e meter te cu cranchinan.

Con pa reduci e riesgo di contaminacion den instalacionnan di awa di bebe?

• Mantene e sistemanan di awa cayente mas cayente posibel sin riesgo di formacion di kalki;
  • European Centre for Disease Prevention and Control ta recomenda 50°C–60°C, 122°F–140°F;
  • Mantene circulacion completo den e sistema di awa cayente;
• Mantene temperatura di e awa friu mas friu posibel, incluyendo tur awa friu cu ta almacena;
• Flush 10% di e salida distal di lugarnan representativo (labamano y ducha) semanalmente; Flush localidadnan di camber rotativo pa sigura cu ta flush diferente camber cada siman;
  • Flush e liña di awa friu desde e salida durante 2 minuut, despues flush e liña di awa cayente te ora alcansa e temperatura maximo, sigui pa un flush di 2 minuut;
  • Mester controla e temperaturanan na 30 y 60 seconde;
• Flush tankinan di warda awa grandi y ekipo cu no ta uza hopi, pero cu ta conecta na e sistema, por lo menos 1 biaha pa siman, pa evita cu e awa ta stanca;
• Haci mashinnan di ijs, cual no ta uza frecuentemente bashi y paga nan;
• Si tin desinfeccion suplementario den e instalacionnan, continua operacion di e desinfeccion suplementario. Consulta e fabricante pa obtene instruccionnan di servicio;
• Verifica nivelnan residual di desinfeccion manera realisa anteriormente of semanalmente;
• Continua operacion/mantencion di sistemanan di tratamento no kimico, manera sistemanan UV;
• Haci mantencion preventivo y verifica e inventario;
• Mantene e documentacion pa flushmento y proceduranan di mantencion actualisa;
  • Documentacion ta garantisa cu ta tuma cada accion necesario pa reduci riesgonan causa pa ocupacion abou.

Legionella

Bacterianan comun den awa di bebe ta Legionella. Nan ta aparece di forma natural den lugarnan humedo, den suela y den awa. Bacterianan Legionella ta mes inevitabel cu tur otro tipo di bacteria. E cantidad di Legionella den awa di bebe ta asina abou cu e bacterianan no ta representa ningun menasa. Sinembargo, den awa stanca, e bacterianan Legionella ta crece y reproduci hopi liher den instalacionnan di awa di bebe!  

Pa companianan y institucionnan di un instalacion di awa di bebe colectivo, ta recomendabel pa haci un evaluacion di riesgo di legionella y pa tin un plan di maneho. Como cu legionella por causa Legionnaires’ disease, ta importante cu abo, como propietario di un instalacion grandi, tuma e medidanan necesario pa limita legionella den tuberia. 
 

Legionnaires’ disease

Legionnaires’ disease ta un infeccion di pulmon causa pa bacterianan Legionella. No ta existi vacuna, pero por trata e enfermedad cu antibioticonan specifico si aplica mas pronto posibel. Tambe ta existi un forma mas leve, e griep di legionella of ‘Pontiac Fever’, cu ta desaroya manera un griep ‘normal’.

Con hende ta infecta?

Personanan ta core riesgo di infecta door di inhala gotanan hopi chikito di awa (den forma di niebla of aerosol) of awa cu ta contene nivelnan halto di bacterianan Legionella. E gotanan aki ta aparece mas tanto den ducha, jacuzzi, bañonan di vapor, fonteinnan y ‘cooling towers’. Mayoria persona no ta bira malo di bebe awa cu Legionella, y e bacterianan aki no ta transferibel di persona pa persona.  Algun persona sinembargo ta core mas riesgo di bira malo, manera adultonan mayor, personanan cu resistencia abou debi na un enfermedad, personanan cu ta uza medicamento anti imuun y esnan cu ta huma.

Con nos aki na WEB Aruba ta preveni Legionella?  

Banda di e programa di testmento periodico, WEB Aruba tin un programa di testmento anual pa detecta Legionella den su red di suministro y distribucion di awa. Si ta detecta cantidadnan halto di Legionella, nos ta tuma accion mesora. Tambe nos tin un programa di mantencion structural pa flush y desinfecta tuberia di awa. Parti di e mantencion ta un programa fiho di tuma muestra den henter e red di suministro y distribucion di awa, incluyendo e tankinan. Ta haci analisis bacteriologico y kimico riba e muestranan di awa. Si WEB Aruba detecta algun muestra cu no ta cumpli cu e standardnan, lo flush e sistema of tuberia y si ta necesario, desinfecta nan.